Nigeria na Cote D'Ivoire zafuzu kwenda Brazil

Nigeria  imefanikiwa  kukata  tikiti  ya  kucheza  katika  fainali  za kombe  la  dunia  mwakani  nchini  Brazil . Nigeria  iliishinda  Ethiopia kwa  mabao  2-0  katika  mchezo  wa  mkondo  wa pili wa mtoano na kupata ushindi wa  jumla ya mabao 4-1.Nigeria  imechukua  nafasi ya  kwanza  kati  ya  tano  zilizotengwa kwa  bara la Afrika  katika kinyang'anyiro  hicho mwakani, na kufuatiwa na  Cote D'Ivoire ambayo  ilifanikiwa  kutoka  sare  ya  bao  1-1 na Senegal  jana Jumamosi. Cote D'Ivoire  imefanikiwa  kukata  tikiti  hiyo  kwenda Brazil  kwa  jumla  ya  mabao 4-2  dhidi  ya  Senegal.Katika  nafasi tatu  zilizobaki  kwa  bara  la  Afrika , Cameroon na Tunisia   na Burkina  Faso na Algeria zinatarajiwa  kupambana leo jioni.

Misri itaikaribisha Ghana katika mpambano utakaofanyika  siku ya Jumanne, utakaokamilisha jumla ya timu tano kutoka bara la Afrika katika fainali za kombe la dunia.